சிக்னலில் தெரிந்த கறுப்பு நிறம்

பச்சை விளக்குக்காக சந்திப்பில்
பல நினைவோடு காத்திருக்கையில்

'அண்ணா' என்ற தங்கையின்
அவலக்குரல் கேட்டு

உலகமே நொடியில்
ஊஞ்சலில் சுற்றியதுபோல்

முன்னால் உள்ளதெல்லாம்
மஞ்சளாய்த் தெரிய

திடுக்கிட்டுத் தடுமாறி
திரும்பிப் பார்த்தால்

பிச்சைக் கேட்டு கை நீட்டி
பச்சிளங்குழந்தையோடு சிறுமி

நல்லவேளை அது தங்கையில்லை
நிம்மதியாய் மூச்சுவிட்டு

'இந்த சமூகத்தின்
இன்றைய நிலையை மாற்றி

ஒருநாள் ஏழ்மையை
ஒழித்தே தீரவேண்டும்' என்ற

சிவப்பு சிந்தனையோடு
சில்லரையைத் தேடும்போது

கையில் பட்டது
பையில் உள்ள பணமும்

பின்னால் உள்ள தர
இடமில்லாத கறுப்பு மனமும்.